08/12/17

ENCONTRO COA ESCRITORA EVA MEJUTO


Rematada a lectura da primera novela de Eva Mejuto, 22 segundos, chegou o momento de nos encontrar os grupos de 4º ESO con ela para partillar as nosas impresións como lectoras dunha novela diferente, valente e moi necesaria.

A súa visita permitiunos coñecer o proceso de creación e de investigación profunda sobre un tema que segue a ser socialmente un gran descoñecido e por iso un gran tabú: a transexualidade.

Moitísimas grazas, Eva, polo esforzo que fixeches para vir compartir connosco un anaquiño de tarde.



22/11/17

DE CAMIÑO CARA AO 25N

Cada 25 de novembro volve colocarse o foco de atención mediática nunha realidade diaria, que non desaparece nunca no día a día ou que mesmo semella reforzarse e ampararse socialmente: a violencia contra as mulleres.

Para reflexionarmos sobre esta data e a realidade social que representa imos escoitar a canción gañadora do II Certame de Música Infantil e Xuvenil, convocado pola Deputación da Coruña, interpretada por un grupo de mozas que se fan chamar "Máis boas cás patacas".


12/11/17

IRMANDADES DA FALA, CEN ANOS DESPOIS

Cen anos despois as Irmandades da Fala volveron ser noticia e iso só pode explicarse por se soster no tempo o seu traballo e, sobre todo, o seu legado.



Mais imos volver a ollada polo retrovisor para coñecer exactamente o porqué desa vixencia atemporal e os logros do proxecto das Irmandades da Fala aínda na actualidade.


23/10/17

ENCONTRO CON JORDI SIERRA I FABRA



Este martes 24 de outubro celebraremos o encontro con Jordi Sierra i Fabra, o autor das nosas primeiras lecturas deste curso en 3º e 4º ESO.



As palabras feridas e Chamando ás portas do ceo ocuparon o noso tempo lector nestes primeiros meses de curso e agora temos a oportunidade de nos encontrar co autor na coruñesa Libraría Moito Conto.

Imos comezar as presentacións achegándonos a este entrevista publicada no xornal La Opinión no día de onte.

17/09/17

BENVIDA AO NOVO CURSO ESCOLAR BLOGUEIRO

Chegou a hora de lle abrirmos a porta ao novo curso escolar 2017-2018 e aquí estamos con todas as expectativas, curiosidades e interrogantes abertos para descubrirmos o mundo desde a materia de Lingua e Literatura Galega.

Preparad@s?

Primeira tarefa programada: cantas linguas acompañan o galego neste mapamundi lingüístico?
 




08/06/17

21 DÍAS CO GALEGO

Despois de nos achegar hai uns meses á actividade dos "21 Días co Galego" do IES da Pobra do Caramiñal, agora toma o relevo o Fogar de Santa Margarida da Coruña.

Imos ver que significa e que representa para estes mozos e mozas dun contorno castelanfalante intentar instalarse no galego como lingua de comunicación habitual.



17/05/17

FELICES DÍAS DAS LETRAS GALEGAS



PONDAL E DOMBATE

Agora que nos achegamos ao poeta pontecesán Eduardo Pondal, imos comprender, da man do especialista da súa obra, o profesor da UDC Manuel Ferreiro, algúns dos fíos que conectan a obra poética pondaliana co seu territorio natural, Bergantiños, como é o poema que representa o dolmen de Dombate.


17/04/17

O ESTADO DA LINGUA


Comezamos o último trimestre de curso afondando na temática sociolingüística nas aulas de 3º e 4º ESO.

O Consello da Cultura Galega acaba de facer público un informe do estado en que se encontran as relacións entre a mocidade galega e o noso idioma, titulado Prácticas e actitudes lingüísticas da mocidade en Galicia.

O xornal Praza Pública ofreceu nos últimos días unha síntese informativa que cómpre lermos e traballarmos en detalle.

1. Como valora o galego a mocidade? Ten prexuízos a respecto do seu uso?
2. Que papel cumpre a escola na trasmisión do galego?


20/03/17

FOTOHAIKUS DE PRIMAVERA (XVIII)

Lucía Canosa recunca neste proxecto de compartir pensamentos, emocións e imaxes...


Un fiel amigo
sempre estará intentando
facerte feliz
 
 
 
 

FOTOHAIKUS DE PRIMAVERA (XVII)

Nova achega de Alejandro Varela ...


Noites bonitas,
mirando esta paisaxe,
noites pensando.
 
 

FOTOHAIKU DE PRIMAVERA (XVI)

Unha nova cara da primavera no obxectivo de Juan Varela...

Veñen as nubes,
cheas de lágrimas,
que triste día.
 
 

FOTOHAIKU DE PRIMAVERA (XV)

E con todas nós... David Amado!!!


Isto comeza
adeus inverno
chega bo tempo

FOTOHAIKU DE PRIMAVERA (XIV)

Adriana Varela amosa unha perspectiva de altura...

En primavera
a tristeza das nubes
vaise moi lonxe
 
 

FOTOHAIKU DE PRIMAVERA (XIII)

Miriam Ares comeza a xeira poética desta primeira semana primaveral...

Reflexo calmo
das ondas do océano
na noite escura
 
 

16/03/17

FOTOHAIKUS DE PRIMAVERA (IX)

E que vos parece esta proposta de Lucía Olmedo?


Todo florece

chegou a primavera 

vida de novo


FOTOHAIKUS DE PRIMAVERA (VIII)

Patricia Bardanca continúa achegando palabras e imaxes...

Contigo marchou,
co nacer da túa luz
vóltalle a vida.


FOTOHAIKUS DE PRIMAVERA (VII)

Marta Tato partilla connosco unha nova e suxerente imaxe poética...


Paisaxes mudas
reflexan fermosura
do bo atardecer 


FOTOHAIKUS DE PRIMAVERA (VI)

María Rodríguez toma o relevo de hoxe...

As cores vivas
reflexan a chegada
da primavera


FOTOHAIKUS DE PRIMAVERA (V)

Sabela Echegaray toma o relevo nesta experiencia fotopoética que dá a benvida á primavera.

Na primavera
nos ollos do mar calmo
o sol reflexa.



FOTOHAIKUS DE PRIMAVERA (IV)

Leticia Bermúdez achéganos a súa perspectiva poético-fotográfica.

Marcha a nevada
veñen as andoriñas
chegan as flores


13/03/17

11/03/17

FOTOHAIKUS DE PRIMAVERA (I)

Imos poñernos en disposición de recibir a primavera e a poesía o próximo 21 de marzo e para iso non hai mellor xeito que observarmos como a natureza espile o inverno e agroman novas cores e olores e retratarmos este momento coas nosas percepcións transformadas en haikus.

Recibimos o primeiro fotohaiku de Antía Varela e agardamos polos vosos!!!

No mes de marzo
volven saír as flores
foxe o mal tempo


28/02/17

ADEUS, ENTROIDO

Vai chegando a fin do entroido e a volta ás aulas e para celebralo nada mellor que un rap recén saído do forno de Ezetaerre.

Xa contaredes que vos parece!!! Sabemos que temos alumnado rapeiro especialista entre nós!!!


DÍA DE ROSALÍA

Imposíbel deixar pasar por alto o 24F, Día de Rosalía, malia cadrar ao celebración do entroido.

Adiantámonos un pouco no calendario e repartimos versos da nosa poeta a eito, por todos os recunchos do noso centro.

Grazas a todas as compañeiras e compañeiros dos diferentes cursos que nos axudaron na escrita de tantos versos e a Bianca, Adriana, María, Cristina, Ylenia, Leticia e Samantha que participaron no reparto para que ninguén quedase sen o seu agasallo especial do día.


14/02/17

DE CONVERSA CON PAULINA CEREMUZYNSKA

Continuamos a xeira de entrevistas a galegas de adopción e agora tócalle a quenda á nosa visita máis recente e descuberta musical: Paulina Ceremuzynska.

Desde 3º A, Uxía Cancela e Carla prepararon esta entrevista coa musicóloga e investigadora medievalista do noso corpus cancioneiril que agora toca partillar con todas vós, visitantes ilustres deste blog didáctico.

Deixámosvos coas palabras de Paulina!


1. Onde vives actualmente?

En Santiago. É case a única cidade galega que non está destrozada en canto a paisaxe.

2. Cando foi a primeira vez que viñeches a Galiza?

Vin por primeira vez no 2000, aos Cursos de Galego para Estranxeiros, organizados pola USC.

3. Cal foi a túa primeira impresión de nós?

A xente pareceume moi amigable. Xente que non me coñecía de nada axudábame desinteresadamente. A hospitalidade paréceme una das cousas máis características e valiosas da sociedade galega.

4. Que botas en falta de Varsovia?

Sobre todo a vida cultural, teatros, concertos. O decididas e concretas que son as persoas. Nada desta inmobilidade de “ir tirando”, de “a ver que pasa” de “éche o que hai”. As casas ben construídas e quentes no inverno. O aprecio cara á cultura propia.

5. Cal é a túa lingua inicial?

A miña lingua materna é o polaco. Teño sorte de criarme e falar unha lingua que non está en perigo, que non é “cooficial”, que nunca tiven que poñer en dúbida.

6. Que outros idiomas falas?

A parte do polaco e galego, falo inglés, castelán, francés e ruso (explicando por se acaso, o ruso é en Polonia unha lingua estranxeira, aprendina nas clases como inglés). Tamén sei latín (pero non o falo), e polo galego entendo bastante ben o italiano, sobre todo escrito. E entendo perfectamente o portugués, tamén polo galego, claro.

7. Cando e onde aprendiches o galego?

Empecei apréndelo na Universidade de Varsovia, no lectorado de galego (en Polonia hai tres lectorados de galego, os outros están na Universidade de Cracovia e de Lublin). Cantaba as cantigas e por iso intereseime pola lingua, para poder cantar mellor este repertorio.

8. Resultouche moi dificultoso? 

Non, o galego obxectivamente non é unha lingua difícil. A gramática é doada, e na pronuncia o único difícil que ten son as vogais abertas e pechadas (custoume dous anos empezar a diferencialas!). Por exemplo o inglés é moito máis difícil e ten moitas máis vogais. O difícil do galego é entender a intención do que fala, o que quere dicir co que di. ;)

9. Desde cando interpretas profesionalmente o noso cancioneiro medieval galego?

Dende o ano 1998.

10. Que te levou a escoller este corpus musical?

A súa beleza. Foi un namoramento dende a primeira escoita. É o que ten a verdadeira arte. Namóraste.

11. Algunha vez te sentiches discriminada ao te expresares en galego?

Houbo intentos. Digo intentos, porque a xente sabe que son estranxeira, que son “estudiosa das cantigas”, que non son emigrante económica, e polo tanto élle moito máis difícil facelo. Tamén ao non ser o galego a miña lingua materna, non me sinto tan vulnerable como se me discriminaran por falar en polaco. Pero si houbo algunas situacións que me molestaron moito, foi cando veu miña nai a visitarme. Facendo compra empezamos a falar cunha persoa que nos atendía e miña nai, querendo ser amable con ela, intentou dicirlle unha cousa sinxela en galego (ou sexa, falarlle na súa lingua!). Esta persoa nisto dime de repente: “pero muller, apréndelle castelán, que lle vas aprender galego!”. Ou sexa, tratou á miña nai como unha persoa que non se sabe valer nin decidir por si mesma, que supostamente non ten educación. Nunca máis volvimos a este comercio, miña nai e eu enfadámonos moito. Despreciar a lingua propia parécenos cousa de ignorancia e de falta de cultura. É un prexuízo daniño que seguen os ignorantes, como cando a xente pensaba que ser zurdo ou ter pel negra era cousa do demo.

12. Que significa para ti o galego?

Sodes vós, se non existe, deixaredes de existir como pobo.

13. Como ves a nosa lingua na actualidade?

Se non se fala, desaparece.




DE PASEO POLAS NOSAS CANTIGAS MEDIEVAIS CON...


... Paulina Ceremuzynska, musicóloga polaca que nos achegou o maxisterio e brillantez do noso corpus lírico medieval galego-portugués nun paseo polo tempo en pasado que nos explica no presente.

Que será o que máis vos sorprendeu, aquilo do que máis gustastes neste encontro, o que descubristes ou o que nunca esqueceremos?

Agardamos polos vosos comentarios!!!!

ILUSTRAR A ESCRITA: DE XOSÉ COBAS A XABIER P. DOCAMPO

 
 
O pasado venres 10 de febreiro o alumnado de 2º e 3º de ESO achegouse ao Kiosco Alfonso da Coruña para coñecer a exposición compiladora dos últimos 30 anos do traballo de ilustración desenvolvido por Xosé Cobas.

Acompañounos no percorrido o escritor Xabier P. Docampo, autor de moitos libros ilustrados pola creatividade de Xosé Cobas.
 
 
 
Unha oportunidade única para admirar en conxunto a simbólica obra gráfica de Xosé Cobas e descubrir como é o traballo de creación conxunta, de texto e imaxe, dos dous creadores. 

O noso agradecemento aos dous por nos atenderen tan xenerosamente!

06/02/17

21 DÍAS CO GALEGO


O IES da Pobra do Caramiñal volve pór en andamento o proxecto educativo coñecido como "21 Días co Galego", dirixido ao seu alumnado.

Nesta ocasión, este proxecto de marcado carácter sociolingüístico, quere ser tamén unha homenaxe colectiva e lectora ao escritor Agustín Fernández Paz.

Non imos deixar pasar por alto esta magnífica oportunidade de nos achegar á súa inmensa obra grazas aos fíos que nos propoñen os seus lectores e lectoras.

E a ti...de que obra(s) de Agustín Fernández Paz gustaches especialmente? Que títulos quedarán para sempre gravados na túa memoria?

30/01/17

NO ANIVERSARIO DE CASTELAO

Xaneiro é o mes de Castelao, pois faleceu o 7 de xaneiro de 1950 e naceu tal día como hoxe, 30 de xaneiro, hai 131 anos.

A lectura de Cousas e de Retrincos achéganos a parte da súa biobibliografía que amplificaremos con outros documentos e mais coa visita á cidade de Pontevedra e ao seu Museo Provincial do vindeiro venres 3 de febreiro.


"O verdadeiro heroísmo consiste en trocar os anceios en realidades e as ideas en feitos" #Castelao

22/01/17

E AGORA CASTELAO EN BANDA DESEÑADA

Despois da recente experiencia vivida coa dramatización das Cousas de Castelao, recibimos a nova de que algúns dos relatos deste libro e mais de Retrincos serán publicados, pola Editorial Galaxia, a partir de maio, en formato de banda deseñada co carimbo do magnífico debuxante Kiko Da Silva.


Xa nos tarda esta nova experiencia literaria dun dos nosos clásicos referentes autoriais, non é?

17/01/17

PRIMEIRA ACHEGA ÁS COUSAS DE CASTELAO

Ímonos achegando a Castelao a través do teatro, concretamente á adaptación de Cousas por parte da compañía Os Quinquilláns.

Grazas á xestión da Concellaría de Cultura e Educación de Coristanco puidemos acudir a esta representación da que moito gustamos e da que deixamos aquí un petisco audiovisual para quen non puido gozar deste luxo e mais as impresións do alumnado participante que irán ficando nos comentarios.






13/01/17

RAMÓN CABANILLAS

As aulas de lingua e literatura galega de 4º ESO lévannos estes días a descubrir o poeta cambadés Ramón Cabanillas como representante dos novos modelos literarios que introduce o primeiro terzo do século XX, concretamente desde o proxecto colectivo das Irmandades da Fala.


Imos achegarnos desde esta presentación á súa biobibliografía e desde a páxina da RAG sintetizaremos os seus principios éticos e estéticos.

A poesía de Ramón Cabanillas volve sempre ao presente en múltiples iniciativas sociais e escolares, así como en reinterpretacións musicais como é o caso dos poemas traballados na aula, Acción Gallega ou En pé!

A partir do visionado desta crónica do Arquivo Sonoro de Galicia poderemos acceder ás intervencións de Paulino Pedret, Aquilino Iglesia, Ramón Otero Pedrayo, enmarcadas nun acto coñecido como "Coroación poética", a última homenaxe a Ramón Cabanillas celebrada en Padrón o 8 de abril de 1958.


10/01/17

LINGUARRISADAS 2017



Hai moitos xeitos de reflexionar sobre a lingua, sobre a sociolingüística, sobre os prexuízos lingüísticos, sobre a realidade do galego, en definitiva.

A edición do calendario que nos ofrece a Área de Normalización Lingüística da Universidade de Vigo, grazas á xenialidade do humorista gráfico Luís Davila, ofrécenos unha reflexión sociolingüística alternativa desde unha peculiar visión humorística.

Tomaremos de base cada unha das doce tiras deste calendario para levantar acta dalgúns dos prexuízos lingüísticos que acompañan, aínda na actualidade, a consideración e uso social do galego.

E quen sabe se, coa retranca que nos gastamos por aquí, aínda somos quen de ampliar o retrato sociolingüístico desta galería para concienciarnos definitivamente das barreiras que impiden a completa normalización da nosa lingua propia e oficial como garantía do seu futuro saudábel.



DESPEDIDA