7º DÍA CON ROSALÍA

Rosalía Villar preséntanos a versión musical deste poema ben coñecido, "Campanas de Bastabales", interpretado por Amancio Prada e gravada o pasado mes de xaneiro no Pazo da Cultura de Pontevedra, na XI edición do festival Cantos na Maré.

Preguntarédesvos por que o escolleu. Velaí a resposta de Rosalía:

  Escollino porque me gustou. É un destes vídeos que escoitas e che gusta, pero descoňeces o motivo.

6º DÍA CON ROSALÍA

Juan Seoane (3ºB) ofrécenos este poema de Rosalía de Castro para a nosa lectura e reflexión, mentres que Leticia Muíño (3ºA) nolo achega arroupado cos son musicais do alumnado do CEIP Ponte dos Brozos (Arteixo) 

Cando penso que te fuches,
negra sombra que me asombras,
ó pé dos meus cabezales
tornas facéndome mofa.

Cando maxino que es ida,
no mesmo sol te me amostras,
i eres a estrela que brila,
i eres o vento que zoa.

Si cantan, es ti que cantas,
si choran, es ti que choras,
i es o marmurio do río
i es a noite i es a aurora.

En todo estás e ti es todo,
pra min i en min mesma moras,
nin me abandonarás nunca,
sombra que sempre me asombras. 

5º DÍA CON ROSALÍA

Sara Costa (3ºA) volve para nos achegar un poema de Rosalía nunha clave musical ben moderna.

A rapeira viguesa AID pon voz a esa muller deshonrada que se viu obrigada a tomar "A xusticia pola man".

4º DÍA CON ROSALÍA

Iria Bouzas (3ºA) toma a palabra e o temón deste blog hoxe para nos abrir a porta da Casa Museo Rosalía de Castro.

No outono de 1947 creouse o Patronato Rosalía de Castro co fin de reparar a Casa da Matanza en Padrón, casa na que Rosalía viviu os seus últimos anos de vida. 

Restaurouse en 1971 e converteuse en Casa-Museo en 1972, aínda que conserva de forma practicamente inalterada a súa estrutura orixinal que consta de dúas plantas. 

Na planta baixa, denominada 'O perfil dunha sombra', pódese apreciar a súa vida, o entorno que a rodeou e a relación do pobo galego coa escritora.

 

A primeira planta, chamada 'O seu', é unha recreación da casa rural da época, entre labrega e fidalga.

 

 

 

3º DÍA CON ROSALÍA

Vanesa Varela (3ºA) escolleu este poema de Rosalía de Castro para a entrada deste 3º Día con Rosalía. Cal é a razón da súa escolla? Velaquí:

Escollín este poema porque me encantou a forma de expresar esas ganas de vivir e de facer o que ti penses sen atender a opinión doutras persoas que expresa Rosalía de Castro neste poema :)

Din que non falan as plantas, nin as fontes, nin os paxaros,
nin a onda cos seus rumores, nin co seu brillo os astros,
dino, pero non é certo, pois sempre cando eu paso,
de min murmuran e exclaman:

-Aí vai a tola soñando
coa eterna primavera da vida e dos campos,
e xa ben pronto, ben pronto, terá os cabelos canos,
e ve tremendo, atericida, que cobre a xeada o prado

-Hai canas na miña cabeza, hai nos prados xeada,
mais eu prosigo soñando, pobre, incurable somnámbula,
coa eterna primavera da vida que se apaga
e a perenne frescura dos campos e as almas,
aínda que os uns esgótanse e aínda que as outras se abrasan.

Astros e fontes e flores, non murmuredes dos meus soños,
sen eles, como admirarvos nin como vivir sen eles?

2º DÍA CON ROSALÍA

Hoxe toma a iniciativa Julia Vila (3ºA) para nos presentar Rosalía de Castro de xeito musical e en formato rapeiro.

O rapeiro monfortino "Kadi Galician Bully" presenta o seu tema "Rosalía de Castro" extraído do próximo disco "Galician Bullys" e grazas a el imos tirar algúns datos da súa biografía e pensamento, ademais de escoitar algún dos seus poemas.

Como era o seu ideario vital? A que poemas nos referimos? Quen responderá primeiro?

1º DÍA CON ROSALÍA

Hoxe iniciamos un camiño novo na nosa comunicación didáctica nas aulas de lingua e literatura galega de 3º e 4º ESO.

Sorprendid@s as persoas que non nos coñezan? Seguro que si, mais imos explicarnos.

Hoxe, 10 de febreiro, iniciamos unha viaxe á descuberta da escritora fundacional da literatura galega, Rosalía de Castro, que rematará o 24 de febreiro, o Día de Rosalía, coincidindo coa data do seu nacemento.

Cada xornada unha alumna ou alumno dos niveis antes mencionados achegaranos algún dato para descubrir esta escritora dun xeito poliédrico e desde diferentes enfoques e formatos. Elas e eles tomarán a palabra para partillaren colectivamente a Rosalía de Castro á que se van achegando.

Con certeza, habemos levar gratas sorpresas da súa capacidade investigadora!

Eu andaría ben atent@ cada día...

E para comezar, Sara Costa (3ºB) lánzanos a pregunta que se fixeron nesta escola de educación infantil de Lañas (A Baña): Viches a Rosalía de Castro?

FORMIGAS... INOCENTES?

Formigas foi a novela negra de Tucho Calvo que nos puxo a pensar sobre o mundo das formigas, especialmente sobre a súa capacidade de traballo e de organización colectiva, pois son ben conscientes (quen o diría con ese tamaño tan minúsculo e inocente que presentan!!!) de que o mellor xeito de conseguir un propósito beneficioso para a comunidade é arrimando o ombreiro cada un dos membros desa comunidade.

Agradecemos a Tucho Calvo a súa visita que moi ben acompañada viña dunha exposición fotográfica de formigas (como non!!!) e mais dos debuxos a lapis orixinais que realizou o ilustrador Abraldes para o libro.

A partir de agora andaremos moito máis atent@s ás formigas...

Aprendendo das formigas...

Lectoras de Formigas e presentadoras de Tucho Calvo

Descubrir a persoa que dá vida á nosa lectura

Unha lembranza máis do autor

Aleixandre agardando feliz a dedicatoria do autor

MAPA DIALECTAL GALEGO

Unha lingua e moitas falas ou falares que axudan a responder esa pregunta tan galega: E ti de quen vés sendo?

Reparade neste audio libro que nos ofrece unha mostra representativa das variedades dialectais galegas. A continuación, realizade a tarefa explicada na aula e consistente en:

* Seleccionar unha gravación de cada bloque dialectal e localizar cinco trazos dialectais que a definan.

Lembrade que esta tarefa de aula será partillada e revisada na aula do vindeiro xoves 6 de febreiro.